റിപ്പബ്ലിക് ഇന്ത്യ നാണയങ്ങൾ (73) - ഉപ്പ് സത്യാഗ്രഹം/ദണ്ഡി യാത്ര 2005

             

ഇന്നത്തെ പഠനം
അവതരണം	BMA കരീം പെരിന്തൽമണ്ണ
വിഷയം	റിപ്പബ്ലിക് ഇന്ത്യ നാണയങ്ങൾ
ലക്കം	73

ഉപ്പ് സത്യാഗ്രഹം/ദണ്ഡി യാത്ര 2005 

ഉപ്പ് സത്യാഗ്രഹത്തിന്റെ അഥവാ ദണ്ഡി യാത്രയുടെ 75ആം വാർഷികം പ്രമാണിച്ച് ഇന്ത്യ ഇറക്കിയ നാണയങ്ങളെ കുറിച്ചാണ് ഇന്നത്തെ ലക്കത്തിൽ പ്രതിപാദിക്കുന്നത്. 

ഇന്ന് ഉപ്പ് സത്യാഗ്രഹത്തിന്റെ 91ആം വാർഷികം ആണ്. അത് കൊണ്ട് ശനിയാഴ്ചകളിൽ പ്രസിദ്ധീകരിക്കുന്ന ഈ പംക്തി ഇന്ന് പ്രസിദ്ധീകരിക്കുന്നു.

ബ്രിട്ടീഷ് ഇന്ത്യയിൽ ഉപ്പിന് നികുതി ചുമത്തിയതിൽ പ്രതിഷേധിച്ച് 1930 മാർച്ച് 12-ന് മഹാത്മാ ഗാന്ധിയുടെ നേതൃത്വത്തിൽ ആരംഭിച്ച അഹിംസ സത്യാഗ്രഹമാണ്‌ ഉപ്പു സത്യാഗ്രഹം എന്നറിയപ്പെടുന്നത്.

1930 മാർച്ച് 12 ന് ഗാന്ധിജിയും 79 സന്നദ്ധപ്രവർത്തകരും, സബർമതി ആശ്രമത്തിൽ നിന്നും 390 കിലോമീറ്റർ അകലെയുള്ള ദണ്ഡി എന്ന തീരപ്രദേശത്തേക്ക് കാൽനടയായുള്ള യാത്രയോടെയാണ്‌ ഇതാരംഭിച്ചത്.

ഏപ്രിൽ 5 ന് ജാഥ ദണ്ഡി കടപ്പുറത്തെത്തിച്ചേർന്നു. "ഇതുകൊണ്ട് ബ്രിട്ടീഷ് സാമ്രാജ്യത്തിന്റെ അടിത്തറ ഞാൻ കുലുക്കും" എന്ന് ഒരു കൈനിറയെ ചെളി കലർന്ന മണ്ണ് കൈയ്യിലെടുത്തുകൊണ്ട് പിറ്റേദിവസം ഗാന്ധി പറയുകയുണ്ടായി.