02/12/2020- കറൻസിയിലെ വ്യക്തികൾ- നീൽസ് ഹെൻറിക് ആബെൽ

          

ഇന്നത്തെ പഠനം
അവതരണം	ഹനീസ് M. കിളിമാനൂർ
വിഷയം	കറൻസിയിലെ വ്യക്തികൾ
ലക്കം	25

   

നീൽസ് ഹെൻറിക് ആബെൽ

പ്രശസ്തനായ നോർവേജിയൻ ഗണിതശാസ്ത്രജ്ഞനായിരുന്നു നീൽസ് ഹെൻറിക് ആബേൽ. നോർവെയുടെ ഭാഗമായിരുന്ന ഫീനോസ് ദ്വീപിൽ 1802 ആഗസ്റ്റ് 5-ന് ജനിച്ച ആബേൽ ഒരു ലൂതറർ വൈദികന്റെ ഏഴു മക്കളിൽ രണ്ടാമനായിരുന്നു. 1829 ഏപ്രിൽ 6-ന് നോർവേയിലെ തന്നെ ഫ്രോലൻഡിൽ വച്ച് ക്ഷയം ബാധിച്ച് മരണമടഞ്ഞു.

27-ആം വയസ്സിൽ തന്നെ മരണമടഞ്ഞെങ്കിലും ചെറുപ്രായത്തിൽ തന്നെ ആബേൽ ഗണിതശാസ്ത്രത്തിൽ കാതലായ കണ്ടുപിടിത്തങ്ങൾ നടത്തിയിരുന്നു. അഞ്ചാം വർഗ്ഗ ബഹുപദങ്ങൾക്ക് ബിജീയനിർദ്ധാരണം സാധ്യമല്ല എന്ന് തെളിയിച്ചതാണ് ആബേലിന്റെ ഏറ്റവും വലിയ സംഭാവന. ദ്വിപദപ്രമേയത്തിന്റെ തെളിവ് അഭിന്നകസംഖ്യകളെയും ഉൾക്കൊള്ളിക്കുന്ന തരത്തിൽ വികസിപ്പിച്ചത് അദ്ദേഹമാണ്. ഗ്രൂപ് സിദ്ധാന്തം എന്ന ഗണിതശാഖയ്ക്ക് തുടക്കമിട്ടു (ഗാൽവയും സ്വതന്ത്രമായി ഇത് വികസിപ്പിച്ചിരുന്നു). എലിപ്റ്റിക് ഫങ്ഷനുകളെക്കുറിച്ചും കാര്യമായ പഠനങ്ങൾ നടത്തിയെങ്കിലും ഇവ അദ്ദേഹത്തിന്റെ മരണശേഷം മാത്രമാണ് പുറത്തുവന്നത്.

ഗണിതശാസ്ത്രജ്ഞർക്കുള്ള നോബേൽ സമ്മാനം എന്ന പേരിൽ അറിയപ്പെടുന്ന ആബേൽ പുരസ്കാരം അദ്ദേഹത്തിന്റെ സ്മരണാർത്ഥം ഏർപ്പെടുത്തിയതാണ്. ഏതാണ്ട് ഒരു മില്യൺ ഡോളർ സമ്മാനത്തുകയുള്ള ഇത് ഓരോ വർഷവും നോർവേയിലെ രാജാവാണ് സമ്മാനിക്കുന്നത്.

1978ൽ നോർവെ പുറത്തിറക്കിയ 500 ക്രോണർ കറൻസി നോട്ട്.    

മുൻവശം(Obverse): നീൽസ് ഹെൻറിക് ആബേലിൻ്റെ ഛായാചിത്രവും, നോർവീജിയൻ സ്‌റ്റേറ്റിൻ്റെ എംബ്ലവും ആലേഖനം ചെയ്തിരിക്കുന്നു.

പിൻവശം (Reverse): ഓസ്   ലോ സർവകലാശാല ചിത്രീകരിച്ചിരിക്കുന്നു.