ഇന്നത്തെ പഠനം | |
അവതരണം | രാജീവൻ കാഞ്ഞങ്ങാട് |
വിഷയം | ചിത്രത്തിനുപിന്നിലെ ചരിത്രം |
ലക്കം | 67 |
ഖുദിറാം ബോസ്
ബംഗാളിലെ മിഡ്‌നാപ്പൂർ ജില്ലയിലെ ഹബീബ്‌പൂരിൽ, തഹസിൽദാറായിരുന്ന ത്രൈലോകനാഥ് ബോസിന്റെയും ലക്ഷ്‌മിപ്രിയാ ദേവിയുടെയും മകനായി 1889 ഡിസംബർ മൂന്നിനാണ് ഖുദിറാം ജനിച്ചത്. ആറാം വയസ്സിൽ അമ്മയെയും വൈകാതെ അച്‌ഛനെയും നഷ്‌ടപ്പെട്ട കുട്ടിക്ക് ചേച്ചിയായ അപരൂപയും ഭർത്താവ് അമൃത്‌ലാലുമാണ് തുണയായത്. അവർക്കൊപ്പമാണ് പിന്നെ ഖുദിറാം ജീവിച്ചത്.
ബ്രിട്ടിഷ് ഭരണത്തിനെതിരെ തെരുവീഥികളിൽ ഉയർന്ന മുദ്രാവാക്യങ്ങൾ ഖുദിറാമിന്റെ മനസ്സിലും അലയടിച്ചു. ബംഗാൾ വിഭജനത്തെ തുടർന്ന് ജനങ്ങളിൽ രോഷം ഇരമ്പിമറിയുകയായിരുന്നു. പലതരത്തിലുള്ള പ്രക്ഷോഭങ്ങൾ നാടെമ്പാടും നടക്കുന്നുണ്ടായിരുന്നു. ക്ലാസിലിരിക്കുമ്പോഴും ഖുദിറാമെന്ന കുട്ടിയുടെ മനസ്സ് സമരപോരാളികൾക്കൊപ്പമായിരുന്നു. ബ്രിട്ടിഷുകാരെ കെട്ടുകെട്ടിക്കാതെ നാടിനു രക്ഷയില്ലെന്ന് അവൻ തിരിച്ചറിഞ്ഞു. അക്കാലത്താണ് ബങ്കിം ചന്ദ്ര ചാറ്റർജിയുടെ ‘ആനന്ദമഠ്’ എന്ന നോവൽ വായിച്ചത്. അതോടെ ജൻമനാടിന്റെ സ്വാതന്ത്രൃത്തിനായി സ്വയം സമർപ്പിക്കാൻ തീരുമാനിച്ചു. യുഗാന്തർ പോലുള്ള വിപ്ലവപ്രസ്‌ഥാനങ്ങളുമായി ബന്ധപ്പെട്ടു. ആയുധങ്ങൾ പ്രയോഗിക്കാൻ പരിശീലനം നേടി. ജനം കൂടുന്നിടത്തെല്ലാം ബ്രിട്ടിഷുകാർക്കെതിരായ ലഘുലേഖകൾ വിതരണം ചെയ്‌തു. അരബിന്ദോയുടെയും സിസ്‌റ്റർ നിവേദിതയുടെയും പ്രഭാഷണങ്ങൾ പ്രചോദനമായി.
കൽക്കട്ട ചീഫ് പ്രസിഡൻസി മജിസ്‌ട്രേട്ടായിരുന്ന കിങ്‌സ്‌ഫോർഡ് ഇന്ത്യക്കാരോടുള്ള മോശം പെരുമാറ്റത്തിന്റെയും വിവേചനത്തിന്റെയും പേരിൽ കുപ്രശസ്‌തനായിരുന്നു. ഭൂപേന്ദ്രനാഥ് ദത്തയെയും യുഗാന്തറിന്റെ മറ്റു പത്രാധിപൻമാരെയും കഠിനതടവിനു ശിക്ഷിച്ചത് കിങ്‌സ്‌ഫോർഡായിരുന്നു. അരബിന്ദോയുടെ പത്രാധിപത്യത്തിലിറങ്ങിയ ‘വന്ദേമാതര’ത്തിനു മേൽ രാജ്യദ്രോഹക്കുറ്റം ചാർത്തപ്പെട്ടു. വിചാരണ നടക്കുമ്പോൾ കോടതിക്കു പുറത്തു തടിച്ചുകൂടിയ യുവാക്കൾ മർദനത്തിന് ഇരയായി. ഇതു ചോദ്യം ചെയ്‌ത സുശീൽകുമാർ എന്ന പതിനഞ്ചുകാരനെ കെട്ടിയിട്ട് അടിക്കാൻ കിങ്‌സ്‌ഫോർഡ് ഉത്തരവിട്ടു. ഇതെല്ലാം ജനങ്ങളിൽ പ്രതിഷേധമുയർത്തി. ഇതിനിടെ മുസഫർപൂരിലേക്കു സ്‌ഥലം മാറി അവിടെ എത്തിയിട്ടും ഈ ഉദ്യോഗസ്‌ഥന്റെ മനോഭാവം മാറിയില്ല. അയാളെ ഇല്ലാതാക്കാൻ യുഗാന്തർ സംഘടന തീരുമാനിച്ചു. ആക്രമണത്തിന്റെ ചുമതല ഖുദിറാം ബോസിനും പ്രഫുല്ലകുമാർ ചാകിക്കുമായിരുന്നു. രണ്ടു തോക്കുകൾ, ബോംബുകൾ, പണം ഇത്രയുമായിരുന്നു അവരുടെ കൈയിൽ.
ബീഹാറിലെ മോത്തിജ്ഹിൽ എന്ന സ്ഥലത്തായിരുന്നു ഖുദീരാം എത്തിപ്പെട്ടത്. അവിടെ അടുത്തുള്ള ഒരു ധർമ്മശാലയിൽ താമസവും, ആൾമാറാട്ടത്തിന്റെ ഭാഗമായി ഹരേൻ ശങ്കർ എന്ന അപരനാമവും സ്വീകരിച്ചു. ആദ്യത്തെ കുറേ ദിവസം, കിങ്സ്ഫോ‍ഡിന്റെ ദിനചര്യ പഠിക്കുവാനായാണ് ഖുദിരാം ശ്രദ്ധിച്ചത്. ക്ലബ്ബിലേക്കും, തിരികേ വീട്ടിലേക്കും പോകുന്ന വഴിയും, സമയവുമെല്ലാം ഖുദിരാം മനപാഠമാക്കി, അയാളെ വകവരുത്താനുള്ള പ്രാഥമിക പദ്ധതിയും തയ്യാറാക്കി.
1908 ഏപ്രിൽ 30 ന് കിങ്സ്ഫോഡ് വരുന്നതും കാത്ത് ഖുദീരാം യൂറോപ്യൻ ക്ലബിനു പുറത്തു കാത്തു നിന്നു. 8:30 ന് കിങ്സ്ഫോ‍ഡിനേയും വഹിച്ചുകൊണ്ടുള്ള വാഹനം പുറത്തേക്കു വന്നപ്പോൾ ഖുദീരാം ഒരു കൈയ്യിൽ തോക്കും ചൂണ്ടിക്കൊണ്ട് , വാഹനത്തിനുനേരെ ബോംബെറിഞ്ഞു. വാഹനം കത്തിയെരിഞ്ഞു, എന്നാൽ ഖുദീരാം പ്രതീക്ഷിച്ചതുപോലെ, അതിൽ കിങ്സ്ഫോഡ് ഉണ്ടായിരുന്നില്ല. മുസ്സാഫർപൂർ കോടതിയിലെ അഭിഭാഷകനായിരുന്ന ബാരിസ്റ്റർ കെന്നിയുടെ ഭാര്യയും കുഞ്ഞുമായിരുന്നു ആ വാഹനത്തിലുണ്ടായിരുന്നത്.
രാത്രിയോടെ, പോലീസ് അക്രമികൾക്കായി തിരച്ചിൽ തുടങ്ങി. അക്രമികളെക്കുറിച്ച് വിവരം നൽകുന്നവർക്കോ, ജീവനോടെ അല്ലാതെയോ പിടിക്കുന്നവർക്കോ സർക്കാർ ആയിരം രൂപ പാരിതോഷികം പ്രഖ്യാപിച്ചു. ഖുദീറാമിന്റെ പിടിക്കാനായി പോലീസ് എല്ലാ റെയിൽവേസ്റ്റേഷനിലും കാത്തു നിന്നു. എന്നാൽ ഖുദീറാം റെയിൽവേ ഗതാഗതമാർഗ്ഗമായി സ്വീകരിക്കാതെ ഗ്രാമപ്രദേശങ്ങളിലൂടെ കാൽനടയായി തന്റെ ലക്ഷ്യസ്ഥാനത്തേക്കു നടന്നു. 25 മൈലോളം കാൽനടയായി ഒരിടത്തും നിൽക്കാതെ സഞ്ചരിച്ച ഖുദീറാം അവസാനം കുടിക്കാൻ കുറച്ചു വെള്ളത്തിനായി ആൾപെരുമാറ്റം കുറവുള്ള വൈനി സ്റ്റേഷനിലേക്കു ചെന്നു. ഖുദീറാമിന്റെ മുഴിഞ്ഞവേഷവും, പാദരക്ഷകളില്ലാത്ത കാൽപാദവും കണ്ട് സംശയം തോന്നിയ രണ്ടു പോലീസുകാർ ഖുദീറാമിന്റെ ചോദ്യം ചെയ്യാൻ ആരംഭിച്ചു. അവരോടെതിർത്ത ഖുദീറാമിന്റെ കയ്യിൽ നിന്നും കൈത്തോക്കു താഴെ വീണു, ഇതു കണ്ട പോലീസ് ഖുദീറാമിനെ കീഴ്പെടുത്തി. രണ്ട് കൈത്തോക്കുകളും, 37 വട്ടം വെടിവെക്കാനുള്ള തിരകളും, കുറച്ചു പണവും ഖുദീറാമിന്റെ കയ്യിൽ നിന്നും പോലീസ് കണ്ടെടുത്തു.
കൗമാരക്കാരനായ വിപ്ലവകാരിയെ കാണാനായി ജനങ്ങൾ തിങ്ങിനിറഞ്ഞ മുസ്സാഫർപൂർ റെയിൽവേസ്റ്റേഷനിൽ ഒരു ഒന്നാം ക്ലാസ്സ് ബോഗിയിൽ നിന്നും കൈവിലങ്ങുകളുമായി 18-19 വയസ്സു തോന്നിക്കുന്ന ആ കൗമാരക്കാരൻ അക്ഷോഭ്യനായി നടന്നു നീങ്ങി, എന്നാണ് അന്നേ ദിവസം ഇംഗ്ലീഷ് പത്രമായ സ്റ്റേറ്റ്സ്മാൻ റിപ്പോർട്ട് ചെയ്തത്. 1908 മെയ് 21 നാണ് ഖുദീറാം ഉൾപ്പെട്ട കേസിന്റെ വിചാരണ ആരംഭിച്ചത്. കോൺടോഫ് എന്ന ഇംഗ്ലീഷുകാരനോടൊപ്പം, നഥുനിപ്രസാദ്, ജനകപ്രസാദ് എന്നീ ഇന്ത്യക്കാരായിരുന്നു ജഡ്ജിമാർ. കാളിദാസ് ബസു, ഉപേന്ദ്രനാഥ് സെൻ, ക്ഷേത്രനാഥ് ബന്ധോപാധ്യാ എന്നീ പ്രമുഖ അഭിഭാഷകരായിരുന്നു ഖുദീറാമിനു വേണ്ടി കോടതിയിൽ ഹാജരായത്. യാതൊരു ഫീസും വാങ്ങാതെയാണ് ഈ പ്രമുഖരായ അഭിഭാഷകരെല്ലാം തന്നെ ഖുദീറാമിനു വേണ്ടി വാദിച്ചത്.
വിചാരണക്കുശേഷം, ജഡ്ജി ഖുദീറാമിന് വധശിക്ഷ വിധിച്ചു. ഒരു പുഞ്ചിരിയോടെയാണ് ഖുദീറാം തന്റെ വിധി വായിച്ചു കേട്ടത്. ചിരിതൂകി നിന്ന ഖുദിറാമിനോട് വിധി മനസ്സിലായോ എന്നു കോടതി ചോദിച്ചു. ഉവ്വെന്ന് ചിരിച്ചുകൊണ്ടു തന്നെ പറഞ്ഞു. തനിക്കു കുറച്ചു കൂടി സമയം ലഭിച്ചാൽ ജഡ്ജിയെ ബോംബു നിർമ്മാണം പഠിപ്പിക്കാൻ കഴിഞ്ഞേനെ എന്നാണ് വിധിക്കു ശേഷം എന്തെങ്കിലും പറയാനുണ്ടോ എന്ന കോടതിയുടെ ചോദ്യത്തിനുത്തരമായി ഖുദീറാം പ്രതികരിച്ചത്. നിയമപ്രകാരം ഏഴു ദിവസത്തിനുള്ളിൽ അപ്പീൽ നൽകുവാൻ കഴിയുമായിരുന്നിട്ടും, ആ പ്രത്യേകാവകാശം ഖുദീറാം ആദ്യം വേണ്ടെന്നു വെക്കുകയായിരുന്നു. എന്നാൽ തന്റെ അഭിഭാഷകരുടെ അഭിപ്രായം കൂടി മാനിച്ച്, അപ്പീൽ നൽകാൻ ഖുദീറാം തയ്യാറായി. എന്നാൽ മേൽക്കോടതിയും ശിക്ഷ ശരി വെക്കുകയായിരുന്നു.
ഓഗസ്റ്റ് 19, 1908 ആറുമണിക്ക് ബോസിനെ തൂക്കിക്കൊല്ലുകയുണ്ടായി. പ്രസന്നവദനായാണ് ഖുദീറാം കൊലമരത്തിലേക്ക് നടന്നു കയറിയതെന്ന് ദൃക്സാക്ഷികളെ ഉദ്ധരിച്ച് അമൃതബസാർ പത്രിക എന്ന പത്രം റിപ്പോർട്ടു ചെയ്യുകയുണ്ടായി. ബംഗാളി കവിയായിരുന്നു കാസി നസ്രുൾ ഇസ്ലാം, ഈ അത്ഭുത ബാലന്റെ ബഹുമാനാർത്ഥം ഒരു കവിത രചിച്ചിരുന്നു.
No comments:
Post a Comment